ወርሒ ምስወጽአት ብቐዳማይ

ኣንቃዕሪረ ሰማይ ሰማይ

ዝረኣኹዎ ላዕላይ ቀላይ!

ይዕንድርሉ ደቂ ጸሓይ

ልክዕ ከም’ዞም ኣብታይ

ይጓየዩ ላዕላይ ታሕታይ።

ናይ’ቶም ከዋኽብቲ ስነስርዓት

ምስ’ቲ ንፋስ ዝነበረ ህድኣት

ኣቤት ክጽብቕ ኩሕለይቲ መርዓት

ኣቤት ክሰፍሕ ሰጥ ዝበለ ቅርዓት።

ኣብ’ቲ ቅርዓት ዘሎ ኽብረት

ዝረኣኹዋ መሲሉኒ ንናጽነት

መዝሙር ልደት እናዘመረት

ምስ መላእኽቲ እናነጠረት።

ቡን ምስ ዕጣኑ እናደከረት

ናይ ሓዲሽ ዓመት ምስተቖነነት

ምስ ዝናን-ባህታን ከምዝፈለለት

ካብ’ዛ ዓለም ዕዳጋ ከምዝፈገደት

ሰማይ ሰማይ ትጥምት ከይደነነት

ናብ’ዛ መሬት ደሃይ ደቃ ከይገበረት

ትኮሓል ትስሕቕ ከይሓፈረት።

ነዚኣ ምስረአት

እዛ ኸብደይ ተገማጠለት

ልበይ ተሃወጸት ከበሮ ወቕዐት

ካብ ሰፈራ ከም ዝሞሎቐት

ፈር-ፈር በለት ኣንፈጥፈጠት

ሰብነተይ  ፈርሐት ተጠራጠረት።

ዋይ’ዛ ናጽነት!

መቐረት ላዕላይ ሰማይ ካብ ጠዓመት

ክትወርድ’ያ ብሓቂ ናብ’ዛ መሬት

ከተጥፍእ!

ናይ ናብራ ድኽነት

ናይ መግዛእቲ ባርነት

ናይ መንግስቲ ስድነት።

ወይስ!

ክትጽበየና’ያ ኣብ’ቲ ገነት

ድሕሪ ሞት ንዝህሉ ሂወት

ዝኸውን ስንቂ እና’ዋህለለት

ተጠራጢረ’ምበር  ብኡነት

ብመልክዕ ናይ ናጽነት።

እንተተገሪምኩም ከም’ዚ ኸማይ

ልዕሊ ህድሞና ዘሎ ሰማይ

ልዕሊ ኣመሪካ ዘሎ ብፍላይ

ልዕሊ አውሮጳ ዘሎ እንኮላይ

ኩሉ ማዕረ …. ይመስል ማይ-ማይ

ፈጣሪ ዘይምሕማይ።

እንተ’ታ!

ትሕቲ ህድሞ ዘላ ምድሪ

በብዓዳ ዘላ ግብሪ

ኣብ ስዑድያ ዘላ ተምሪ

ኣብ ኣመሪካ ዘላ ኽብሪ

ኣብ አውሮጳ ዘላ ፍቕሪ

ኣብ ሲናይ ዘላ ረመጽ-ጓህሪ

ኣብ ኤርትራ ዘላ ናይ ስታሊን በትሪ

ናይ ሰብ’ዩ ኣይኮነን ናይ ፈጣሪ።

ስለ’ዚ!

መዋዕልና ከነስተማቕሮ

ናጽነት ክትወርድ ካብ’ቲ መሳቕሎ

ኣብ’ዛ ዕዳጋና ክትረክብ መዋዕሎ

ብወፈራ ዓደ’ቦ እንተዝግምጠል ህድሞ

ንቖልዓ ንሽማግለ ምኾነ መዓቑቦ።

ክሳብ ዝርከብ ሓቦ ዝግምጥል ህድሞ

እንተ ተሳኢኑ መሳልል መዳይቦ

ሰማይ ዝኣከቦ ነነጢርና ክንስዕሞ

ይፍጠረልና ….. ለልብና ዝብህጎ።

ራህዋን ቅሳነትን ንህዝቢ ኤርትራ።

Daniel T Teclegiorgis

(This email address is being protected from spambots. You need JavaScript enabled to view it.)