እንተትልወጢ ብዛላ’ምበሳ
ምሃለዎዶ ጣዕሳ?
ኣዋሳ ናይ ሲዳሞ ኣዋሳ
ንኸብካብ ናይ ናጽነት ንንግሳ
ምእንቲ ኽትኮንለይ ጥቓ ድግሳ
እንተ ዝልውጠኪ ብዛላም’በሳ

ምሃለዎዶ ጣዕሳ።
ናጸነት ጓል ናቕፋ
ብጉልባብ ናይ ባደመ ተጠሊፋ
ብእንዳ ዝናን ባህታን ተጓሒፋ
ኣብ ሲናይ ተገሪፋ ከም ቆጽሊ ረጊፋ
እንተ ረኸበት ካብ ቦዶዊን ዘናግፋ
ሃሰስ ትብል ዘላ መንገዲ ተስፋ
ኣዋሳ ድያ ነቒላ ክትድግፋ።

ናጽነት!
ንኽብለኪ ናጽነት
ብሓቂ ድየ ብእምነት
መምዘኒኺ’ባ ንገርኒ ብኡነት።

ዝሓሰብኩዎ ካብ ዘይኮነለይ
ዝረኣዮ ምስ መስከረ ዓይነይ
ዝሰምዖ ምስ ደገመ እዝነይ
ደጊም!
ከይዳህሰስኩ ብኢደይ
ኣይገብረለይን’ዩ ከብደይ
ኣይቅበልን’ዩ ልበይ
ብእንዳ ዝናን ባህታን ተገፊፉ’ዩ ቐልበይ።

ናጽነት መስክሪ ውዕሎኺ ንገሪ
ኣስፊሕኪ ምኸሪ ንሲናይ ዘክሪ።

ከመይ ኔሩ መገሻ
ካብ ቦሌ ንኣዋሳ
መንቀሳቐሲ ወረቐትኪኸ ኣበይ’ያ ተሓዲሳ
ኣብ ኣዋሳዶ ኣብ ዓዲ ሓውሻ!
ወያ ሰናይ ዘመን ክትመጽእ’ያ ግዲ ተመሊሳ።

ትጎዪ’ላ ኣዋሳ
ካብ ኩላተን ርሒሳ
ንሃረርታ ክሒሳ
ንመንእሰይ ደቢሳ
ንለውጥን ዕርቅን ተበጊሳ።

ጎይታ ሰላም ይቐድሳ
ብመዓርን ጠስምን ይሞግሳ
ኣብ ግዜ ሰላም ክንበጽሓ ክንምለሳ።

ኣዋሳ ናይ ሲዳሞ ኣዋሳ
እንተ ዝልውጠኪ ምስ ዛላም’በሳ
ምሃለዎዶ ጣዕሳ።
ራህዋን ቅሳነትን ንህዝቢ ኤርትራን ኢትዮጵያን።

ዳንኤል ተስፋዮውሃንስ
11-28-2011
This email address is being protected from spambots. You need JavaScript enabled to view it.