ተበራበር፡ ወዲ ሃገር!
ከመይ አለኻ: ወዲ ሃገር!
ሓሲሙዋ’ሎ ዓድኻ: ድሃያ ግበር!
= . . . . . . . . .++ . . . . . . . . . .=
ኣታ ደቂስካ ዘለኻ ወዲ ሃገር
እንታይ  ኰንካ ኢኻ ዘይትባራበር?
ሕዝባ ይጸንት አሎ እዛ ሃገር!
ገሊኡ ብጥሜት፡ ገሊኡ ብጓሂ፡ ገሊኡ ብዓረር

ገሊኡ ከም ጠበቕ፡ ኣብ መንቀራቐሮ
ኣብ ጎዳጕዲ ዒራዒሮ
ከመይ’ሉ ኽጾሮ?!
ገሊኡ አብ ገልዓሎ፡ ማይ ስኢኑ መተርከስ ጎሮሮ

ገሊኡ ኣብ ግብ ዝበለ “ኮንተይነር”
ኣብ ገዛእ ሃገሩ፡ ብደዉ  ክቕበር!
ሓውካ ይጠፍእ ኣሎ ካብ ሃገር
ናብ ዘይፈልጦ ምድሪ ክስደድ ክሳገር
ይበርስ እዩ ዘሎ ወዲ ሃገር
ኣንታ ወዲ ሃገር!
ነዚ እነዳ ርኤኻስ፡ ከመይ ኢለካ እዩ ደቂስካ ዝሕደር!?
ሓውካ ፈሪሑ ክሽቚረር
ካብ ዓዱ ኽባረር

አብ መገዲ ስደት

ከም እንስሳ ሓሲሩ፡ ክማታተር!
ንሱን ክቕበር
አካላቱን ክነብር
ሕይወት ሰብ ከናብር!
ኣንታ ወዲ ሃገር!
ነዚ እንዳ ርኤኻስ ዓይንኻ ተዕውር!
ካን ደቂስካ ኽትሓድር!
ዘይትባራበር!?
ከም ቀደምካ ዘይተሓብር?

ዘይትእከብ፡ ፍታሕ ክርከብ
ኡይ! ዘይትብል ረዳኢ ኽትረክብ
ክቡር ወዲ ሃገር፦
ወዱን ጓሉን፡ ከይሞተ ክቕበር
ገሊኡ ድራር ዓሳ ኾይኑ፡ አብ ዘይፈልጦ ባሕሪ ክስወር
ገሊኡ ተጨውዩ፡ ከም አቕሓ ተሸይጡ፡ ብዘይ መኽሰብ
ኣብ ዘይከፍሉዎ ክዕሰብ
ንስኻ፡ ብሓላፊ ረብሓ፡ ብገንዘብ ክትጥበር!?
ገሌኻ ኸኣ ንሥለጣን ክትመጣጠር?
ጥልዕ ምልዕ ክትብልስ ዓገብ!
ዘይትዛባዘብ!?

ንዓ ወዲ ሃገር! ንቡር ግበር!
ካብ ድቃስካ ተበራበር’ሞ
ናይ ለውጢ ማዕበል ፍጠር
ሥ..መ…ርርርርርር!!
ንድሕነት ሕዝብኻ፡ ንስለ ኽብሪ ሃገር
ታሪኽካ ጽሓፎ፡ ንዓ ቊም ነገር ግበር
መኻይድኻ ኣለሊ፡ ሥመር!
ናይ ዝሓለፈ ይትረፍ፡ ናይ ዝመጽእ ምኸር

ንዓ ከም ሰብ፡ ተላዘብ
ስማዕ ተሰማማዕ
ተገጣጠም፡ ተሰጣጠም፡ ሕበር!
ሥመር! ስለ ደቅ ሕዝቢ ደቅ ሃገር

ዓቢ ምስ ንእሽቶ፡ ገዲም ምስ ሓዲስ፡ ሥመር!
ክስታናይ ኣስላማይ፡ ሥመር!
ወዲ ቆላ ምስ ወዲ ከበሳ፡ ሥመር!
ሥመር! ስለ ሕዝቢ፡ ስለ ሃገር

አብ ሓደ መስመር፡ ተር.ር.ር…! በል

ሥመር!
ተኣከብ፡ ተጠመር
ሓቢረካ ተኾመር


ምስ ሠመረካን ምስ ደልደለካን

ገጽካ ናብ ዓዲ ግበር
ንቕድሚት ተወርወር!
ዝዓግተካ የልቦን፡ ጥራሕ ሥመርርርር!
ካብ ጸልማት፡ ናብ ብርሃን ክትሳገር
ተበራበር፡ ሥመር!
ትንሣኤ-ሙታን ክትገብራ ነዛ ሃገር
ሰብስ ኣብ ዓዱ፡ ከቢሩ እንተ ነበረ እዩ’ምበር
ናብ ዓዲ ሃገር ክሳገር!?

ካብ ሓርፋፍ ናብ ከርፋሕ
ክእሰር-ክፍታሕ፡
ገሊኡ ኽጥባሕ!
ከም ሥጋ ኽምተር!?
ኣንታ ወዲ ሃገር!

እሞ እዚ እናርኤኻስ ትድቅስ!?
ሕልናኻ ዘይትወቅስ!?
ንዓ ሥመር!
ሥመር! ስለ ሃገር
አብ ሓደ መስመር
ተር ከም ዓተር!
ተኣከብ፡ ተጠመር
እምባ ኹን፡ ተኾመር

ምስ ሠመረካን ምስ ደልደለካን
ገጽካ ናብ ዓዲ ግበር
ንቕድሚት ተወርወር
ዝዓግተካ የልቦን፡ ጥራሕ ሥመርርርር!
ወዲ ሃገር! ንዓ ሥመር!

ነዛ ሕስረት ደቅ-ሃገር፡ ነዛ መከራ
ንስደት ክንሰዳ
እታ እትነብዕ ዘላ ጓል ምስ አሕዋታ
ክትምለስ ንዓዳ

ኣታ ወዲ ሃገር፡  ብዓል ዋዕላ
ነዛ ሥቓይ ደቂ ሃገር፡ አቕልበላ
ንምኽሪ ወረጃ አስተውዕለላ
“ሠሚረ እየ፡ ኣብ ሓደ መስመር” በላ
ነዛ ሃገር፡ ተስፋ ምለሰላ
ኩልኻ ወዲ ሃገር አብ ዘሎኻ አሊኻ
ወይ ሥመር፡ ፋሕ’ዩ ጸላኢኻ
ወይ ክትጠፍእ ኢኻ!
ዋዛ ድኣ ይመስለካ ይኸውን እምበር
እንታይስ ተሪፉካ!
ኣብ አፈርክቡ እንድኣልካ ዘለኻ!
ወዲ ሃገር!
ኣየ እዛ ናትካ ነገር!
ካብ ተተኣኪብካ ትከራኸር
ዘይትላዘብ!? ዘይትፋቐር?!
መርምር ሕልናኻ
ዝገደፍካ ገዲፍካ
ተወሃሃድ፡ ሕበር፡ ሥመርርርር!!!!
ብዓንቶቦኡስ እነታይ ዝፈላሊ ኔሩካ?!
ተጋጊኻ!

ኣባ-ሥመር