ኦስሎ ኖርወይ ንሃገራዊ ዋዕላ ዝምልከት ኣኼባ

ብሰንበት ዕለት 11 ሓምለ ንጉዳይ ሃገራዊ ዋዕላ ንዲሞክራስያዊ ለውጢ ብዝምምልከት፡ ኣብ ኦስሎ ኖርወይ ሰፊሕ ምዪጥን ምርድዳእን ዝተገብሮ ኣኼባ ተኻይዱ፡፡ እዚ ኣኼባ`ዚ ኣቐዲሙ ክግበር መደብ ወጺኡዎ እኳ እንተነበረ፡ ብሰንኪ ዝተፈላለየ ቴክኒካዊ ጸገማት`ዩ፡ ክሳብ ሕጂ ከይተገብረ ክጸንሕ ክኢሉ፡፡

ይኹን እምበር እዚ ኣኼባ`ዚ ከም ቀንዲ ኣብ ኣጀንድኡ ኣስፊሩ ብኣትኩሮን ብስፍሓትን ዝዘተየሎም ነጥብታት፡ ብዛዕባ ኣብ`ቲ ዋዕላ ዝውክልዎ ሰባት ኣብ  ምምራጽን፡ ነቶም ኣብ`ቲ ኣኼባ ዝምረጹ ወከልቲ ኮነ ነቶም ናብ ዋዕላ ንኽኸዱ ተቐሪቦም ዘለዉ ወከልቲ ሲቪካዊ ማሕበር፡ ነቲ ዋዕላ ዝኾኑ ኣገደስቲ ለበዋታት ብምእካብ ንምስናቕ፡ እዩ ኔሩ፡፡

ኣብ`ቲ ኣኼባ ናይ ህዝቢ ወከልቲ ክኾኑ ይኽእሉ እዮም ተባሂሎም ካብ ዝተሓጽዩ ሰባት ድማ፡ ሓደ ሰብ ከም ወኪል ናይ ህዝቢ ኮይኑ ክምረጽ ተኻኢሉ ኣሎ፡፡ እቲ ኣኼባ ሰለስተ ሰባት ናይ ምምራጽ መደብ እኳ ይንበሮ እምበር፡ ነቲ ዘሎ ናይ ግዜ ሕጽረት ኣብ ግምት ብምእታው፡ ኣኼበኛ ነቲ ውጽኢት ብሓጎስ`ዩ ተቐቢሉዎ፡፡   

ብድሕሪ`ዚ ድማ ኣኼበኛታት ነቲ ኣብ ኣኼባ ዝተመርጸን ነቶም ኣብ ጉባኤ ንኽሳተፉ ተቐሪቦም ዘለዉ ወከልቲ ሲቪካዊ ማሕበርን፡ ከም`ቲ ተመዲቡ ዝነበረ፡ ዘድሊ ለበዋታትን ርእይቶታትን ማዕዳን ብምስናቕ ድሕሪ ምምራቖም፡ እቲ ኣኼባ ብዓወት ተዛዚሙ፡፡

ዕለት፡ 15.07.10

ዓወት ንሃገራዊ ዋዕላ ንዲሞክራስያዊ ለውጢ
ምንቅስቓስ ሕብረት ኤርትራውያን ኣብ ኖርወይ

Eritreisk Ffeleskaps forening i Norge
Eritrean unity movement in Norway