ኣብ ስዊስ ፖለቲካዊ ዑቕባ ዝሓተቱን ነበርትን ኤርትራውያን።

ህዝቢ ኤርትራ ብህግደፍ ኣብ ዝጭቆነሉ፣ ሰብኣዊ መሰላት ኣብ ዘይክበረሉ፣ መንእሰያትና ግዳያት ናይ ምድረ በዳን፣ ቀለብ ዓሳ ባሕሪን ዝኾኑሉ፣ ብሰንኪ ስርዓት ኣልቦ ምሕደራ ስርዓት ህግደፍ፣ ሃገርና ትባድመሉ ዘላ ግዜ፣ ብሕቡራት ሃገራት ኣብ ልዕሊ ህግደፍ እገዳ ስለ ዝተወሰነ፣ ንኣብ ወጻኢ ዝርከብ ህዝብን ካልኦት ሃገራትን ዘይፍትሓዊን አብ ልዕሊ ህዝቢ ኤርትራ ከምዝተወሰነ ኣምሲልካ፣ ንምድንጋር ንዝግበር ዘሎ ሸፈጥን፣ ፋኸራን፣ ህግዳፋውያን ንምልከቶ አሎና። ንሓልዮት ህዝቢ ዘይኮነ ነቲ ብሓይሊ ሰለይትን ቀተልትን ወተሃደራትን ስልጣን ህዝቢ መንዚዑ ናይ ዘሎ መራሒኦም ዕድመ ስልጣኑ ንኸናውሑ፣ ዝግበርዎ ዘለዉ ብመኸተ ደሞክርስያውያን ከንቱ ፈተነ ክኸውን ኢዩ።

አብ ኤውሮጳ ዝቕመጡ ተደናገፅቲ ስርዓት ኢሳያስ ፣ ነቲ እገዳ ክንቃወሞን ክንምክቶን ኢና ብምባል ላዕሊን ታሕትን ክብሉ ንዕዘቦም ኣሎና። እቲ እገዳ አብ ርእሲ መራሕቲ ስርዓት ህግደፍ ዘተኮረ እዩ። ህዝቢ ኤርትራ እንተኾነ ብስርዓት ህግደፍ ካብ ዚእገድ ድሮ 19 ዓመት ኮይኑ አሎ። ኣብ ልዕሊ ኤርትራ እገዳ ዝተወሰነሉ ምኽንያት ናይ ስርዓት ህግደፍ ዕንደራ ፖለቲካ ኣብ ቀርኒ ኣፍሪቃ፣ ዘይሕጋውን ዘይፍትሓውን፣ ስለ ዝኾነ ኢዩ። ሰለዚ ብቐጥታ ብሓላፍነት ዝሕተተሉ ህ.ግ.ደ.ፍ. እዩ። ብወገንና ኣብ ልዕሊ ሃገርና ኤርትራ እገዳ ክግበር ዘሐጒሰና ጉዳይ ኣይኮነን። ብስንኪ ንቑጽ ይነድድ ርሑስ ከምዝበሃል፣ ብኣካይዳ ህ.ግ.ደ.ፍ ህዝቢ ከይልከም ጸረ ዕንደራን ዕብለላን መንግስቲ ህግደፍ ኢዩ ሰላማዊ ሰልፊ ክግበር ዝግብኦ። ሰለዚ ድማ ማሕበር ኤርትራውያን ንስላምን ንደሞክራስን አብ ስዊስ አብ ልዕሊ መራሕቲ ስርዓት ህግደፍን፣ ዕዳጋ ብረትን፣ ዕንደራ ፖለቲካኡን፣ ዘተኮረ እገዳ ሕቡራት ሃገራት ይድግፍ ።
 
በዚ መሰረት አብ ስዊስ ዝርከቡ ስደተኛታት ሓተትቲ ዑቕባን፣ ፍቓድ ዝተቐበሉን፣ አብ ኤርትራ ዝግበር ዘሎ ናይ ህዝቢ ወጽዓ፣ ነዚ ዘሎ ስርዓት ህ.ግ.ደ.ፍ. ምኽንያት ብምግባር ናይ መንበሪ ፍቃድ ዝሓዙን፤ ተመሊሶም ንህ.ግ.ደ.ፍ. ይቕረታ ዝሓተቱን፣ 2% ዝኸፍሉን፣ ኣብ ውራያት ናይ ህ.ግ.ደ.ፍ. ዘሳስዩን፣ ኣብ ልዕሊ መንእሰያት ራዕድን ሽበራን ዘዋፍሩ ንዘለዉን፣ አብ መደባት ህ.ግ.ደ.ፍ ዝሳተፉን ግዚኡ አብቂዑ እዩ። ደው በሉ።