ኣብ እስራኤል፣ ኣፍሪቃውያን ስደተኛታት ዝጀመርዎ ሰለማዊ ሰልፊ ይቕጽል ኣሎ።

እቲ ብዕልት 05/01/2014 ዝጀመረ ኣብ ታሪኽ እስራኤል ብስደተኛታት ዝተገብረ ሰለማዊ ሰልፊ ብብዝሑ ዝልዓለ ቁጽሪ ተሳታፊ ዝተረኽበሉ ምዃኑ ዝተገልጸ፣ ልዕሊ 35 ሽሕ ፣ መብዛሕቲኦም ኤርትራውያንን ሱዳናውያንን ዝኾኑ፣ ብዙሓት ህጻናትን ዓበይትን፣ ስደተኛታት ዝሳተፍዎ ዘለዉ ሰለማዊ ሰልፊ፣ ንሳልሳይ ማዓልቱ ቀጺሉ። እቲ ንፖሊሲ እስራኤል ኣብ ልዕሊ ስደተኛታት ዝቃወም ሰለማዊ ሰልፊ፣ ኣብ ዝሓለፈ እዋን ብተደጋጋሚ ብውሑዳት ተሳተፍቲ ይካየድ ምንባሩ ዝዝከር እዩ፣ እዚ ናይ ሕጂ ሰለማዊ ሰልፊ መቐጸልታ ኮይኑ፣ ነቲ ብመንግስቲ እስራኤል ዝተወሰነ፣ ስደተኛታት ናብ "ሆሎት" ዝተባህለ ኣብ ምድ-ረበዳ ዝተደኮነ ማዓስከር ናይ ምጥርናፍ መደብን ግፋን ንምቅዋምን ብቐንዱ ድማ፣ እስራኤል ናይ ስደተኛ መሰሎም ክትሕልወሎምን ከም ናይ ፖለቲካ ስደተኛታት ኣፍልጦ ክትህቦምን ዝጠልብ'ዩ።

እቲ ሰለማዊ ሰልፊ ኣብ ቀዳማይ ማዓልቱ፣ ብጭርሖታት ኣብ ሓደ ቦታ ብምእካብ ድምጺ ብምስማዕ ጀሚሩ። ኣብ'ቲ ቦታ ዝተፈላለዩ ተደናገጽትን ወከልቲ ማሕበራትን እስራኤላውያን ናይ ደገፍ ድምጾም ኣስሚዖም።

ኣብ ካልኣይ ማዓልቲ፣ ሰልፈኛታት ከም'ቲ ልሙድ ካብ'ቲ ኩሉ ግዜ ከም መበገሲ ዝጥቀምሉ "ለቭንስኪ ፓርክ" ዝብሃል ቦታ፣ ናብ ዝተፈላላያ ኤምባሲታትን ቤት-ጽሕፈት ዝተፈላለያ ማሕበራትን በብጉጅለ ብምኻድ ድምጾም ኣስሚዖምን ብወከልቶም ኣቢሎም ጠለባቶም ዝሓዘ ጽሑፍ ኣረኪቦምን። እቲ ናብ ኤምባሲታት ኣሜሪካ፣ ፈረንሳ፣ ካናዳ፣ ጣልያንን ካልኦት ልዕሊ ዓሰርተ ኤምባሲታትን ከምኡ'ውን ናብ ቤት-ጽሕፈት UNHCR ዝተላእከ ጽሑፍ ገለ ካብ ትሕዝትኡ ነዚ ዝስዕብ ይመስል፣

መንግስቲ እስራኤል፣

1. ስደተኛታት ምእሳር ጠጠው ከብልን ተኣሲሮም ዘለዉ ስደተኛታት ክፈትሕን።

2. ናይ ነፍስ-ወከፍ ስደተኛ ጉዳይ ብተናጸል ክርአን ክጽናዕን ።

3. መሰረታዊ መሰላት ስደተኛታት ከኽብርን ብውዕል ጀነቫ ክቅየድን።

ጸቕጢ ይገበረ.ሉ፣ ዝብልን ካልእን ይርከቦ።

ሳልሳይ ማዓልቲ፣ ሰልፈኛታት ኣብ ለቭንስኪ ፓርክ ብምእካብ ድምጾም ከስምዑ ውዒሎም።

ኣካይድቲ ናይ'ቲ ሰልፊ ከምዝገለጽዎ; እቲ ሰልፊ ቀጻሊ ምዃኑን ሓደ ንጹር መልሲ ከይረኸቡ ከምዘየቋርጽዎን ይሕበር። ራብዓይ ማዕልቲ'ቲ ሰልፊ ፍቓድ ካብ ፖሊስ ብምሕታት ናይ እግሪ ጉዕዞ ካብ ከተማ ተል-ኣቪቭ ናብ ከተማ ዮርሳሌም ክኸውን ምዃኑ ተገሊጹ።

እቲ ብሄልኮፕተራትን ብብዝሒ ኣባላት ጸጥታን ዝተሰነየ ሰለማዊ ሰልፊ ኣቓልቦ ማዕከናት ዜና ዓለምን ማሕበረ-ሰብ ዓለምን ይረክብ ኣሎ።