[VoMD] Voice Of Meselna Delina

ኣብዘን ዝሓለፋ ዓመታት ኣብ ልዕሊ ቤተ ክርስትያን ተዋህዶ ዝተፈጸመ ግፍዒ ማእለያ የብሉን። ንኽልተ ሽሕ ዓመታት ተዓቂቡ ዝጸንሐ ጽኑዕ እምነትን ስርዓትን ዘፍርስ ኩነታት ብምርኣይና ከም ኩሎም ብጉዳይ ቤተ ክርስትያን ዝግደሱ ሰባት ኣሕዚኑና እዩ። ኣብ ታሪኽ ቤተክርስትያን ተራእዩን ተሰሚዑን ዘይፈልጥ ጭዋ ሰብ ዋና ኣመሓዳሪ ቤተ ክርስትያን ኪኸውን፤ እቶም ብጸጋ መንፈስ ቅዱስ፤ ብድምጺ ኩለን ገዳማት፤ ምሉእ ተሳትፎ ምእመናን ኦርቶዶክስ ተዋህዶ ቤተ ክርስትያንን ምስክርነት ሊቀ ጳጳሳት ቤተ ክርስትያን ግብጽን ዝተመርጹ 3ይ ፓትርያርክ ቅዱስ እንጦንዮስ ብህይወት እንከለዉ ብሓይሊ ካብ ስልጣኖም ኪእለዩ ዘደንጹ እዩ። ከም ውጽኢት ናይዚ ሰይጣናዊ ዓመጽ'ዚ ድማ እንሆ ፓትርያርክ እንጦንዮስ ካብታ ንልዕሊ ሰብዓ ዓመት ዘገልገልዋ ቤተ ክርስትያን ተፈልዮም ቅዱስ ቁርባን እኳ ከይወስዱ ተኣጊዶም ኣለዉ።

ምሁራት ካህናትን ዲያቆናትን ብዘይተፈልጠ ጉዳይ ብዘይ ፍትሒ ካብ ዝእሰሩ ዓመታት ኮይኑ ኣሎ፡ ዝቐረበሎም ክሲ ድማ ክሳብ ሎሚ የሎን። ብሉጻት ሊቃውንቲ፤ ካህናትን ድያቆናትን ብዘይፈልጥዎ ምኽንያት ካብ ቤተክርስትያን ተሰጒጎም ይርከቡ። ቤተክርስትያን ውሉድ ኣልቦ ኮይና ብዘይ ተተካኢ ወለዶ ንኽትተርፍ ድማ ኮነ ኢልካ መንእሰያት ብመደብ ፋሕ ኪብሉን ኪብተኑን ተገይሩ። ኣብ ቤተ ክርስትያን መድሃኔ ዓለም ዝነበረ ቤት ትምህርቲ ሰንበት ተዓጽዩ ይርከብ። ካህናት ብመደብ ናብ ሃገራዊ ኣገልግሎት ንኽከዱ ኣቶ ዮፍታሀ ዲመጥሮስ ባዕሉ ፈሪሙ ከምዝኸዱ ገይሩ።

ዝሓለፈ በደል ኣብ ክንዲ ምፍዋስ፣ ሕጂ ድማ ዝበኣሰ፣ ፓትርያርክ እንጦንዮስ ብህይወት እንከለዉ ብኻልእ ፓትርያርክ ንኽትክኡ ተገይሩ ኣሎ። መንግስቲ ህግደፍ ብጉልባብ ጳጳሳት ብዘይ ፍርዲ ሕጊ ረጊጹ ካብ መዓርጎም ኣውሪድዎም። ሕጊ ተዋህዶ ቤተ ክርስትያን ፓትርያርክ ካብ ስልጣኑ ዝወርድ ብሰለስተ ነገራት ጥራይ ምኻኑ ድሕሪ ምግላጹ ብዘየማትእ መገዲ ”ፓትርያርክ ካብ መዓርጉ ቅድሚ ምውራዱ ምእንቲ መሰሉ ኪከራኸር መሰሉ ሕልው እዩ።” ክብል (ሕጊ ኦርቶዶክስ ተዋህዶ ቤተ ክርስትያን ኤርትራ, 1995፡ ገጽ 58) ብንጹር ኣስፊርዎ ይርከብ። ፓትርያርክ ኣንጦንዮስ ግና እዚ መሰል እዚውን ተሓሪምዎም እዩ። እንኮ ገበን ፓትርያርክ እንጦንዮስ፣ ሕጊ ቤተክርስትያን ይከበር፣ ቤተክርስትያን ድማ ብጭዋ ሰብ ዮፍታሀ ክትመሓደር ሕጊ ኣየፍቅድን’ዩ ስለዝበሉ ጥራይ’ዩ። እዚ ድማ ብዝኾነ መዓቀኒ በደል ኣይኮነን።
ብሓፈሽኡ እቲ ኣብ ልዕሊ ቤተ ክርስትያን ተዋህዶ ወሪዱ ዘሎ ዓመጽ ዘርዚርካ ዝውዳእ ኣይኮነን። ኣንቱም ሰባት ደርጊስ ካብዚ ሓሊፉ እንታይ ግዲ ገይሩ እዩ? ኣቶ ኢሳያስ ኣብ ሞንጎና ከም ቦኽሪን ከም ሕሳስልደን ከምዘይማሞቐ ሕጂ ተመሊሱ ከመዮ "ዘዕበኽዎ ከልቢ ነኺሱኒ" ዝብልዎ ኮይኑ። ግና መስጣ ናይዞም ኩሎም ፈቐዶ ማእሰርቲ ዝበልዩ ዘለዉ ንጹሃት ሰባትን ፈቐዶ ባሕሪ ዝጠፍኡ ዘለዉ ንጹሃት ዜጋታትን ደሞም ኣብ ቅድሚ ኣምላኽ ዓሪጉ የእዊ ኢዩ ዘሎ። ሓንቲ መዓልቲ ድማ ንሱ ብዘይ ሕጊ ዝፍረደላ መዓልቲ ክትመጽእ ኢያ።

ብሓፈሽኡ፣ ኣብ ዘመነ መግዛእቲ እኳ ተራእዩ ዘይፈልጥ ግፍዒ ኣብ ዘመነ ናጻ ኤርትራ ኣብ ልዕሊ ኤርትራውያን ከምዚ ዓይነት በደል ኪፍጸም ከሎ “ናይ ጥፍኣት ርኽሰት ኣብታ ቅድስቲ ቦታ ቆይሙ እንተ ረአኹም እቲ ዘንብብ ሰብ የስተውዕል” ዝብል ትንቢታዊ ቃል ይፍጸም ከም ዘሎ ጥራይ’ዩ ዘገንዝብ።

እዚ ሕጊ ቤተክርስትያን ዝጠሓሰ ፋሉል ኣሰራርሓ እዚ ግና እንታይ'ዩ ረብሕኡ? እንትርፎ ምእመናን ምብትታን፣ ንቤተ ክርስትያን ካብቲ ኃዋርያዊ ሰንሰለት ንክትብተክ ምግባር፣ ውዒሉ ሓዲሩ ድማ ኣብ ሃገርና ሕንፍሽፍሽን ዕንወትን ከስዕብ እንተዘይኮይኑ ካልእ ረብሓ የብሉን። እዚ ብስም ቤተክርስትያን ዝግበር ዘሎ ሕጊ-ኣልቦ ስራሕ መንፈሳውን ባህላውን ክብርና ንዘንተ-እለት ዘጽንት፣ ዓለም ለኻዊ ሕጊ ቤተ ክርስትያን ዝግህስ፣ ክብሪ ወለዲ ዝጥሕስ ጸያቒቶ እዩ። ስርዓት ህግደፍ ግና ዓለም ለኻዊ ሕጊ ክኽበር እሞ ጉዳይ ዶብ ብሕጋዊ መገዲ ክትግበር እናጸውዓ፣ ንሱ ግና ንሕጊ ኣብ ኣፍ ደገ ቤተክርስትያን ረጊጽዋ ይርከብ ኣሎ። እዝስ እንታይ እበሃል? ሓቓ'ንድያ እዛ ዶብና ጠልጠል ክትብል። ኤእ! ንፍትሒ ቁልቁል ኣፋ ረጊጽካ በቲ ኻልእ ድማ “ፍትሒ ስኢንና”፣ “ዓገብ በሉልና” እናበልካ ፈቐዶ እኼባታት ምንባሕሲ እንታይ'ዩ ፋይዳኡ? ካብ መዓቱ ይሰውረና! ጳጳሳት ኣገዲድካ፡ ድምጺ ህዝቢ ኤርትራ ዓፊንካ፡ ካብ ኣሓት ኦርየንታል ተዋሕዶ ቤተክርስትያናት ተሓቢእካ ዝተገብረ ዘይሕጋዊ ምርጫ ፓትርያርክ፡ ብሚንስትሪ ዜና ህግደፍ ፍሉይ ምድላዋት ተገይርሉ ዝተዘርግሐ እኳ እንተኾነ፡ ነቲ ዝተፈጸመ ዓመጽ ናብ ፍትሒ ነቲ ሓሶት ናብ ሓቂ ብምንም ተኣምር ኪቕይሮ ኣይክእልን'ዩ።
 

እግዚኣብሄር ንቤተክርስትያንና ሃገርናን ዓለም ብምልኡን ሰላም ይሃብ። ኣሜን!
መነኮሳት፡ ካህናትን ድያቆናትን ተዋህዶ ቤተክርስትያን
ኣስመራ ኤርትራ